.jpg)
வவுனியா, புளியங்குளம் புதூர் பகுதியில் இடம்பெற்ற கோர வீதி விபத்தில் இளம் குடும்பஸ்தர் ஒருவரும் அவரது ஒரு வயதுக்குட்பட்ட குழந்தையும் உயிரிழந்துள்ளனர். இந்த விபத்தில் படுகாயமடைந்த தாய், ஆபத்தான நிலையில் வவுனியா பொது வைத்தியசாலையில் அனுமதிக்கப்பட்டு சிகிச்சை பெற்று வருகின்றார்.
இவ்விபத்து நேற்று (09.10.2026) காலை ஏ-9 வீதியின் புளியங்குளம் புதூர் பகுதியில் இடம்பெற்றுள்ளது.
முந்திச் செல்ல முயன்றபோது நேர்ந்த விபத்து
யாழ்ப்பாணத்திலிருந்து அனந்தர் புளியங்குளம், சமளங்குளம் பகுதியில் அமைந்துள்ள தமது காணிக்குச் செல்வதற்காக ஒரே குடும்பத்தைச் சேர்ந்த மூவர் மோட்டார் சைக்கிளில் பயணித்துள்ளனர்.
இதன்போது, அவர்களது மோட்டார் சைக்கிள் ஏ-9 வீதியின் புதூர் பகுதியை அடைந்தபோது, முன்னால் சென்ற வாகனமொன்றை முந்திச் செல்ல முயன்றுள்ளது.
இதன் போது எதிரே வந்த மற்றுமொரு வாகனத்துடன் மோட்டார் சைக்கிள் நேருக்கு நேர் மோதியதில் பாரிய விபத்து இடம்பெற்றுள்ளது.
தந்தையும் பச்சிளம் குழந்தையும் உயிரிழப்பு
விபத்தில் படுகாயமடைந்த மூவரும் உடனடியாக மீட்கப்பட்டு புளியங்குளம் பிரதேச வைத்தியசாலைக்குக் கொண்டு செல்லப்பட்டுள்ளனர்.
எனினும், அவர்களைப் பரிசோதித்த மருத்துவர்கள், தந்தையும் ஒரு வயதுக்குட்பட்ட குழந்தையும் ஏற்கனவே உயிரிழந்துவிட்டதாகத் தெரிவித்துள்ளனர்.
உயிரிழந்த இருவரினதும் சடலங்கள் தற்போது புளியங்குளம் வைத்தியசாலையின் பிரேத அறையில் வைக்கப்பட்டுள்ளன.
விபத்தில் ஆபத்தான நிலையில் இருந்த தாய், மேலதிக அவசர சிகிச்சைக்காக வவுனியா பொது வைத்தியசாலைக்கு மாற்றப்பட்டு சிகிச்சை பெற்று வருகின்றார்.
புளியங்குளம் பொலிஸார் விசாரணை
இச்சம்பவம் தொடர்பான மேலதிக விசாரணைகளை புளியங்குளம் பொலிஸார் தீவிரமாக முன்னெடுத்து வருகின்றனர்.
இளம் குடும்பஸ்தரும் அவரது பச்சிளம் குழந்தையும் உயிரிழந்த இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.
