.jpg)
வங்காள விரிகுடாவின் மேற்கு-மத்திய கடற்பகுதியில் எதிர்வரும் 27ஆம் திகதி காலையளவில் பலத்த புயல் உருவாகக்கூடும் என வளிமண்டலவியல் திணைக்களம் எச்சரிக்கை விடுத்துள்ளது.
இலங்கையைச் சூழவுள்ள கடற்பகுதிகளுக்கான அடுத்த 24 மணித்தியால வானிலை முன்னறிவிப்பை வெளியிட்டுள்ள திணைக்களம், வங்காள விரிகுடாவில் நிலவும் குறைந்த காற்றழுத்தத் தாழ்வுப் பகுதி படிப்படியாக வலுவடைந்து சூறாவளியாக மாறக்கூடும் எனத் தெரிவித்துள்ளது.
தாழமுக்கம் சூறாவளியாக வலுவடைய வாய்ப்பு
வளிமண்டலவியல் திணைக்களத்தின் அறிக்கையின்படி, வங்காள விரிகுடாவில் நிலைகொண்டுள்ள குறைந்த காற்றழுத்தத் தாழ்வுப் பகுதி இன்று (25) காலை 8.30 மணியளவில் வட அகலாங்கு 15.3 பாகை மற்றும் கிழக்கு தீர்க்கரேகை 91.2 பாகைக்கு அருகில் மையம் கொண்டிருந்தது.
இந்த வானிலைத் தொகுதி இன்று வங்காள விரிகுடாவின் கிழக்கு-மத்திய பகுதி மற்றும் அதனை ஒட்டிய தென்கிழக்குப் பகுதி ஊடாக நகர்ந்து, ஆழ்ந்த தாழமுக்கமாக வலுவடைவதற்கான அதிக சாத்தியக்கூறுகள் காணப்படுகின்றன.
தொடர்ந்து தெற்கு நோக்கி நகர்ந்து, பின்னர் திசைமாறி வடமேற்குத் திசையில் நகரக்கூடும் என எதிர்பார்க்கப்படுகிறது. இதன்படி, நாளை (26) காலையளவில் சூறாவளியாகவும், நாளை மறுதினம் (27) காலையளவில் வங்காள விரிகுடாவின் மேற்கு-மத்திய கடற்பகுதியில் மேலும் வலுவடைந்து பலத்த புயலாகவும் மாறக்கூடும் எனத் திணைக்களம் தெரிவித்துள்ளது.
மீன்பிடி நடவடிக்கைகளைத் தவிர்க்குமாறு அறிவுறுத்தல்
வட அகலாங்கு 10 முதல் 20 பாகை வரையிலும், கிழக்கு தீர்க்கரேகை 80 முதல் 95 பாகை வரையிலும் அமைந்துள்ள கடற்பகுதிகளில் மறு அறிவித்தல் வரை மீன்பிடி மற்றும் கடல்சார் நடவடிக்கைகளில் ஈடுபடுவதைத் தவிர்க்குமாறு அறிவுறுத்தப்பட்டுள்ளது.
குறித்த கடற்பகுதிகளில் ஏற்கனவே மீன்பிடி மற்றும் கடல்சார் நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான பகுதிகளுக்குச் செல்லுமாறும் கேட்டுக்கொள்ளப்பட்டுள்ளனர்.
மேலும், வளிமண்டலவியல் திணைக்களத்தால் வெளியிடப்படும் அடுத்தடுத்த வானிலை முன்னறிவிப்புகள் மற்றும் அதிகாரபூர்வ அறிவிப்புகள் குறித்து அவதானமாக இருக்குமாறும் மீனவர்கள் மற்றும் கடல்சார் சமூகத்தினரிடம் கோரிக்கை விடுக்கப்பட்டுள்ளது.
இலங்கையைச் சூழவுள்ள கடற்பகுதிகளில் பலத்த காற்று வீசக்கூடும்
இந்த வானிலைத் தொகுதியின் தாக்கத்தால் இலங்கையைச் சூழவுள்ள கடற்பகுதிகளில் ஆங்காங்கே மழை அல்லது இடியுடன் கூடிய மழை பெய்யக்கூடும்.
காற்று தென்மேற்குத் திசையிலிருந்து மணிக்கு 30 முதல் 40 கிலோமீற்றர் வேகத்தில் வீசக்கூடும். திருகோணமலையிலிருந்து காங்கேசன்துறை, புத்தளம், கொழும்பு, காலி மற்றும் ஹம்பாந்தோட்டை ஊடாக பொத்துவில் வரையான கடற்பகுதிகளில் காற்றின் வேகம் அவ்வப்போது மணிக்கு 50 முதல் 60 கிலோமீற்றர் வரை அதிகரிக்கக்கூடும்.
குறித்த கடற்பகுதிகள் அவ்வப்போது கொந்தளிப்பாகக் காணப்படும் எனவும், நாட்டைச் சூழவுள்ள ஏனைய கடற்பகுதிகள் ஓரளவு கொந்தளிப்புடன் காணப்படக்கூடும் எனவும் தெரிவிக்கப்பட்டுள்ளது.
கடல் அலைகள் 2.5 மீற்றர் வரை உயரக்கூடும்
புத்தளத்திலிருந்து கொழும்பு, காலி மற்றும் மாத்தறை ஊடாக பொத்துவில் வரையான கடற்பகுதிகளில் கடல் அலைகள் சுமார் 2.0 முதல் 2.5 மீற்றர் வரை உயரக்கூடும் என எதிர்பார்க்கப்படுகிறது.
இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்று வீசுவதுடன், கடற்பகுதிகள் மிகவும் கொந்தளிப்பாகவும் மாறக்கூடும் என எச்சரிக்கப்பட்டுள்ளது.
எனவே, மீனவர்கள், கடல்சார் தொழிலாளர்கள் மற்றும் கடற்பயணங்களில் ஈடுபடுவோர் வானிலை அறிவுறுத்தல்களைப் பின்பற்றி அவதானத்துடன் செயற்படுமாறு கேட்டுக்கொள்ளப்படுகின்றனர்.
