அழகுசாதனப் பொருட்களுக்குள் மறைத்து ஹஷிஷ் கடத்தல்: கட்டுநாயக்கவில் மூவர் கைது!

 

சுமார் 5 கோடியே 10 லட்சம் ரூபா பெறுமதியான ஹஷிஷ் போதைப்பொருளை நாட்டிற்குள் கடத்தி வந்ததாகச் சந்தேகிக்கப்படும் மூன்று தாய்லாந்து பிரஜைகள் கட்டுநாயக்க சர்வதேச விமான நிலையத்தில் இன்று (15) அதிகாலை கைது செய்யப்பட்டுள்ளனர்.

விமான நிலைய பொலிஸ் போதைப்பொருள் ஒழிப்புப் பணியக அதிகாரிகளால் மேற்கொள்ளப்பட்ட சோதனை நடவடிக்கையின்போதே இவர்கள் கைது செய்யப்பட்டுள்ளனர்.

கைது செய்யப்பட்டவர்களில் 22 வயதுடைய இருவரும் 33 வயதுடைய ஒருவரும் அடங்குவதாகத் தெரிவிக்கப்பட்டுள்ளது.

பயணப் பைகளில் மறைத்து வைக்கப்பட்டிருந்த போதைப்பொருள்

சந்தேகநபர்கள் மூவரும் இன்று (15) அதிகாலை 12.30 மணியளவில் தாய்லாந்தின் பெங்கொக் நகரிலிருந்து தாய் ஏர்வேஸ் நிறுவனத்திற்குச் சொந்தமான TG-307 விமானத்தின் மூலம் கட்டுநாயக்க விமான நிலையத்தை வந்தடைந்துள்ளனர்.

இதன்போது, அவர்கள் கொண்டு வந்த மூன்று பயணப் பைகளையும் அதிகாரிகள் சோதனையிட்டுள்ளனர்.

அந்தப் பைகளில் அழகுசாதனப் பொருட்கள் அடங்கிய கொள்கலன்களுக்குள் மிகவும் நுட்பமான முறையில் மறைத்து வைக்கப்பட்டிருந்த 5 கிலோகிராம் 96 கிராம் ஹஷிஷ் போதைப்பொருள் கண்டுபிடிக்கப்பட்டுள்ளது.

கைப்பற்றப்பட்ட போதைப்பொருளின் மொத்தப் பெறுமதி சுமார் 5 கோடியே 10 லட்சம் ரூபா என மதிப்பிடப்பட்டுள்ளது.

நீதிமன்றத்தில் ஆஜர்படுத்த நடவடிக்கை

கைது செய்யப்பட்ட மூன்று சந்தேகநபர்களையும் கைப்பற்றப்பட்ட போதைப்பொருளுடன் மேலதிக சட்ட நடவடிக்கைகளுக்காக இன்று நீர்கொழும்பு நீதவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளது.

இச்சம்பவம் தொடர்பில் கட்டுநாயக்க விமான நிலைய பொலிஸ் போதைப்பொருள் ஒழிப்புப் பணியக அதிகாரிகள் மேலதிக விசாரணைகளை முன்னெடுத்து வருகின்றனர்.

Share on Facebook Share on Twitter