இந்தக் கலந்துரையாடலுக்குப் பின்னர், தனியார் பேருந்து சேவைகளை தொடர்வதா அல்லது வேறு நடவடிக்கைகளை மேற்கொள்வதா என்பது குறித்து இறுதி முடிவு அறிவிக்கப்படும் என இலங்கை தனியார் பேருந்து உரிமையாளர்கள் சங்கத்தின் தலைவர் கெமுனு விஜேரத்ன தெரிவித்துள்ளார்.
அனைத்து பேருந்து சங்கங்களின் பிரதிநிதிகளும் இன்று காலை ஒன்றுகூடி, தற்போதைய எரிபொருள் விலை உயர்வு காரணமாக ஏற்பட்டுள்ள சவால்கள் மற்றும் அதன் தாக்கங்கள் குறித்து விரிவாக ஆராயவுள்ளதாக அவர் கூறினார்.
மேலும் கருத்து தெரிவித்த அவர், எரிபொருள் செலவினங்கள் அதிகரித்துள்ள நிலையில் தற்போதைய கட்டணத்தில் பேருந்து சேவையை நடத்துவது கடினமாகிவிட்டதாக தெரிவித்தார். இதனால் பல பேருந்து உரிமையாளர்கள் சேவையிலிருந்து விலக வேண்டும் என்ற கோரிக்கையை முன்வைத்துள்ளதாகவும் அவர் குறிப்பிட்டார்.
அரசாங்கத்திடமிருந்து இதுவரை சாதகமான பதில் எதுவும் கிடைக்கவில்லை என்றும், தொழிலை எவ்வாறு பாதுகாப்பது என்பது தொடர்பில் சங்கத் தலைவர்கள் மற்றும் உறுப்பினர்களுடன் ஆலோசனை நடத்தப்பட்டு இன்று இறுதித் தீர்மானம் அறிவிக்கப்படும் என்றும் கெமுனு விஜேரத்ன தெரிவித்தார்.
இந்த முடிவு, நாடு முழுவதும் இயங்கும் தனியார் பேருந்து சேவைகள் மற்றும் பயணிகளுக்கு முக்கிய தாக்கத்தை ஏற்படுத்தக்கூடும் என எதிர்பார்க்கப்படுகிறது.
