.jpeg)
.jpeg)
சுமார் ஐந்து இலட்சத்திற்கும் சற்று அதிகமான மக்கள் தொகையைக் கொண்ட சிறிய தீவு நாடான கேப் வெர்டே, நட்சத்திர வீரர்கள் நிறைந்த ஸ்பெயின் அணியின் தாக்குதல்களை முழு ஆட்ட நேரமும் வெற்றிகரமாகத் தடுத்து நிறுத்தியது.
போட்டியின் ஆரம்பம் முதல் பந்தைக் கட்டுப்பாட்டில் வைத்திருந்தது ஸ்பெயின் அணியாக இருந்தாலும், கேப் வெர்டே வீரர்களின் ஒழுங்கமைக்கப்பட்ட தடுப்பாட்டமும், தன்னம்பிக்கையுடனான ஆட்டமும் ஸ்பெயின் அணியை பலமுறை ஏமாற்றமடையச் செய்தது.
முதல் பாதியில் மார்க் குகுரெல்லா வழங்கிய பந்தை ஃபெரான் டோரஸ் கோலை நோக்கி அடித்தபோது அது கம்பில் பட்டுத் திரும்பியது. அதனைத் தொடர்ந்து மிக்கெல் ஓயர்சபால் தலையால் முட்டிய பந்தை கேப் வெர்டே அணியின் அனுபவம் மிக்க கோல்காப்பாளர் வோசின்ஹா அபாரமாகத் தடுத்தார். 40 வயதான வோசின்ஹா, போட்டி முழுவதும் சிறப்பான ஆட்டத்தை வெளிப்படுத்தினார்.
'ப்ளூ ஷார்க்ஸ்' என அழைக்கப்படும் கேப் வெர்டே அணி, தடுப்பாட்டத்தில் மட்டும் கவனம் செலுத்தாமல், அவ்வப்போது எதிரணிப் பகுதிக்குள் நுழைந்து தாக்குதல்களையும் முன்னெடுத்தது.
இரண்டாம் பாதியில் ஃபேபியன் ரூயிஸ் உள்ளிட்ட ஸ்பெயின் வீரர்கள் பல முயற்சிகளை மேற்கொண்ட போதிலும், கேப் வெர்டே அணியின் உறுதியான பாதுகாப்பு அரணை உடைக்க முடியவில்லை.
71வது நிமிடத்தில் இளம் நட்சத்திர வீரர் லாமின் யமால் களமிறக்கப்பட்ட பின்னர் ஸ்பெயின் அணியின் தாக்குதல் வேகம் அதிகரித்தது. எனினும், கேப் வெர்டே வீரர்கள் அவரையும் திறம்படக் கட்டுப்படுத்தியதால் கோல் வாய்ப்புகள் குறைந்தன.
போட்டியின் இறுதிக்கட்டத்திலும் ஸ்பெயின் அணிக்கு கிடைத்த வாய்ப்புகளை பயன்படுத்த முடியாத நிலையில், கேப் வெர்டே அணி வரலாற்றுச் சிறப்புமிக்க ஒரு புள்ளியைப் பெற்று உலகக் கிண்ண அறிமுகத்தை மறக்க முடியாத சாதனையாக மாற்றியுள்ளது.
.jpeg)