அடுத்த 36 மணி நேரம் அவதானம்! – பல மாகாணங்களுக்கு கனமழை மற்றும் இடியுடன் கூடிய மழை எச்சரிக்கை.

 இலங்கைக்கு வடகிழக்கே நிலைகொண்டுள்ள குறைந்த அழுத்தப் பிரதேசம் தொடர்ந்து செயற்பட்டு வருவதாக தெரிவித்துள்ளது.

இந்த குறைந்த அழுத்த மண்டலம் அடுத்த 36 மணித்தியாலங்களில் இலங்கையை விட்டு விலகிச் செல்லக்கூடும் என எதிர்பார்க்கப்படுகின்றது. இருப்பினும், அதன் தாக்கத்தால் நாட்டின் பல பகுதிகளில் தொடர்ந்தும் மழையுடன் கூடிய வானிலை நிலவும் என எச்சரிக்கப்பட்டுள்ளது.

அதன்படி, மேல் மாகாணம், சப்ரகமுவ மாகாணம், மத்திய மாகாணம், வடமேல் மாகாணம் மற்றும் வட மாகாணம் ஆகிய பகுதிகளிலும், அநுராதபுரம், காலி மற்றும் மாத்தறை மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும்.

குறிப்பாக மேல், சப்ரகமுவ மற்றும் வடமேல் மாகாணங்களின் சில பகுதிகளில் சுமார் 150 மில்லிமீற்றர் வரை மிக பலத்த மழை பெய்யக்கூடும் என எதிர்வுகூறப்பட்டுள்ளது.

மேலும், காலி மற்றும் மாத்தறை மாவட்டங்களின் சில இடங்களில் 100 மில்லிமீற்றருக்கு அதிகமான பலத்த மழை பெய்ய வாய்ப்புள்ளதாகவும் தெரிவிக்கப்பட்டுள்ளது.

அதேவேளை, ஊவா மாகாணம் மற்றும் கிழக்கு மாகாணம் பகுதிகளில் பிற்பகல் 1.00 மணிக்குப் பின்னர் மழை அல்லது இடியுடன் கூடிய மழை உருவாகக்கூடும்.

நாட்டின் பெரும்பாலான பகுதிகளில் வானம் மேகமூட்டத்துடன் காணப்படும் என்றும், இடியுடன் கூடிய மழையின் போது தற்காலிகமாக பலத்த காற்று மற்றும் மின்னல் தாக்கங்கள் ஏற்படக்கூடும் என்றும் எச்சரிக்கப்பட்டுள்ளது.

இதனால், பொதுமக்கள் தேவையான முன்னெச்சரிக்கை நடவடிக்கைகளை மேற்கொண்டு, குறிப்பாக மின்னல் தாக்கம் மற்றும் திடீர் காற்றினால் ஏற்படும் அபாயங்களிலிருந்து பாதுகாப்பாக இருக்குமாறு அதிகாரிகள் அறிவுறுத்தியுள்ளனர்.

Share on Facebook Share on Twitter