.jpeg)
அமெரிக்க ஜனாதிபதி டொனால்ட் டிரம்ப் ரஷ்யா மற்றும் உக்ரைன் இடையிலான போரில் மூன்று நாட்கள் தற்காலிக போர் நிறுத்தம் அமல்படுத்தப்படுவதாக அறிவித்துள்ளார்.
டிரம்ப் தனது Truth Social பக்கத்தில் வெளியிட்ட பதிவில், இந்த தற்காலிக அமைதி உடன்பாடு சனிக்கிழமை முதல் திங்கட்கிழமை வரை (மே 9, 10, 11) அமலில் இருக்கும் என தெரிவித்துள்ளார்.
இதனைத் தொடர்ந்து உக்ரைன் ஜனாதிபதி வோலோடிமிர் ஜெலென்ஸ்கி X தளத்தில் இதை உறுதிப்படுத்தியதுடன், அமெரிக்காவின் முயற்சியால் இந்த ஒப்பந்தம் ஏற்படுத்தப்பட்டதாகவும் தெரிவித்துள்ளார்.
ரஷ்ய ஜனாதிபதி ஆலோசகர் யூரி உஷகோவ் தெரிவித்ததாவது, அமெரிக்க நிர்வாகத்துடன் நடைபெற்ற தொலைபேசி பேச்சுவார்த்தைகளின் பின்னர் இந்த ஒப்பந்தம் எட்டப்பட்டது. அதேபோல், ரஷ்யா–உக்ரைன் இரு தரப்பும் அமெரிக்காவுடன் தொடர்ந்த பேச்சுவார்த்தைகளில் ஈடுபட்டிருந்ததாகவும் அவர் கூறினார்.
மேலும், இரண்டாம் உலகப் போரின் வெற்றி தினத்தை முன்னிட்டு ரஷ்யா முன்பு அறிவித்திருந்த ஒருதலைப்பட்ச போர் நிறுத்தத்துடன் இந்த ஒப்பந்தம் தொடர்புடையதாகவும் தெரிவிக்கப்பட்டுள்ளது.
இந்த தற்காலிக அமைதி காலத்தில் அனைத்து இராணுவ நடவடிக்கைகளும் நிறுத்தப்படுவதுடன், இரு நாடுகளுக்கும் இடையே தலா 1,000 போர்க்கைதிகள் பரிமாற்றம் நடைபெறும் என்றும் தெரிவிக்கப்பட்டுள்ளது.
இதற்கிடையில், உக்ரைன் மற்றும் ரஷ்யா இடையிலான நீண்டகால அமைதி பேச்சுவார்த்தைகள் தொடர்ந்து நடைபெற்று வருவதாகவும், போரை முடிவுக்கு கொண்டு வரும் முயற்சிகள் முன்னேறி வருவதாகவும் டிரம்ப் தெரிவித்துள்ளார்.
எனினும், கிழக்கு உக்ரைனின் டொனெட்ஸ்க் பகுதி தொடர்பான நிலப்பரப்பு விவகாரம் இன்னும் முக்கிய தடையாக இருந்து வருவதாக சர்வதேச ஊடகங்கள் தெரிவிக்கின்றன.
.jpeg)