.jpg)
.jpg)
சமூக ஊடக விளம்பரங்களை நம்பி இலட்சக்கணக்கில் பணத்தை இழக்கும் மாணவர்கள், பெற்றோர்கள் – வெளிநாட்டுக் கல்வி வாய்ப்புகளைத் தேர்வு செய்வதில் அவதானம் தேவை!
வெளிநாட்டுப் பல்கலைக்கழகங்களில் மாணவர் சேர்க்கை பெற்றுத் தருவதாகக் கூறி, சமூக ஊடகங்கள் ஊடாகப் பகிரப்படும் போலி விளம்பரங்கள் தொடர்பில் பொதுமக்கள் எச்சரிக்கையுடன் இருக்குமாறு இலங்கை கணினி அவசரகாலத் தயார்நிலைப் பிரிவு (Sri Lanka CERT) அறிவுறுத்தியுள்ளது.
இவ்வாறான போலி விளம்பரங்களை நம்பி ஏமாந்து, இலட்சக்கணக்கான ரூபாய்களை இழந்த பெற்றோர்கள் மற்றும் மாணவர்களிடமிருந்து முறைப்பாடுகள் கிடைத்துள்ளதாக அந்த அமைப்பு தெரிவித்துள்ளது.
சமூக ஊடகங்களில் வெளியாகும் சில விளம்பரங்களில், வெளிநாட்டுப் பல்கலைக்கழகங்களில் கல்வி கற்பதன் மூலம் விசா பெற்றுக்கொள்ள முடியும் என்றும், அங்கு சில ஆண்டுகள் பணியாற்றுவதற்கான அனுமதியைப் பெற்று, பின்னர் குடியுரிமையையும் பெற்றுக்கொள்ள முடியும் என்றும் கவர்ச்சிகரமான வாக்குறுதிகள் வழங்கப்படுகின்றன.
இத்தகைய விளம்பரங்களில் சில முற்றிலும் மோசடியானவை எனத் தெரிவித்துள்ள CERT, அவற்றில் குறிப்பிடப்படும் தொலைபேசி இலக்கங்களைத் தொடர்புகொள்ளும் மாணவர்களுக்கும் பெற்றோர்களுக்கும் நம்பிக்கையூட்டும் வகையில் பல்வேறு தகவல்கள் வழங்கப்படுவதாகக் குறிப்பிட்டுள்ளது.
மோசடியில் ஈடுபடுபவர்கள், உலகின் முன்னணி பல்கலைக்கழகங்களின் பிரதிநிதிகள் எனத் தங்களை அறிமுகப்படுத்திக்கொள்கின்றனர். பதிவுக் கட்டணம் மற்றும் முதலாம் கல்வியாண்டுக்கான கட்டணத்தைச் செலுத்தினால் பல்கலைக்கழகத்தில் இணைந்து கொள்ள முடியும் என்றும், பின்னர் பகுதிநேர வேலை செய்து தங்குமிடம் மற்றும் உணவுச் செலவுகளைச் சமாளிக்கலாம் என்றும் தெரிவிக்கின்றனர்.
மேலும், அடுத்தடுத்த கல்வியாண்டுகளில் கல்வி உதவித்தொகைகளைப் பெற்றுக்கொள்ள முடியும் என்றும் கூறி மாணவர்களைக் கவருகின்றனர். இதன் மூலம் வெளிநாட்டில் கல்வி கற்க வேண்டும் என்ற ஆர்வத்துடன் இருப்பவர்களைத் தமது வலையில் சிக்கவைக்கின்றனர்.
இந்த மோசடிகளை நம்பகமானவையாகக் காட்டுவதற்காக, மின்னஞ்சல் குழுக்கள் மற்றும் வாட்ஸ்அப் குழுக்களை உருவாக்கி, சம்பந்தப்பட்ட பல்கலைக்கழகங்களின் புகைப்படங்கள், காணொளிகள் மற்றும் தகவல்களைப் பகிர்ந்துகொள்கின்றனர்.
இவ்வாறு பகிரப்படும் சில புகைப்படங்களும் காணொளிகளும் இணையத்திலிருந்து பெறப்பட்டவையாக இருக்கலாம். அத்துடன், மாணவர் சேர்க்கைக்காக வழங்கப்படும் ஆவணங்களும் உண்மையான பல்கலைக்கழக ஆவணங்களைப் போன்ற தோற்றத்தில் தயாரிக்கப்படுகின்றன.
இதனைத் தொடர்ந்து, கட்டணங்களைச் செலுத்துவதற்காக வெளிநாட்டு வங்கிக் கணக்கு விபரங்களையும் வழங்குகின்றனர். இதனால், பல்கலைக்கழகச் சேர்க்கை உண்மையானது என நம்பும் மாணவர்களும் பெற்றோர்களும் இலட்சக்கணக்கான ரூபாய்களைப் பணமாகச் செலுத்துகின்றனர்.
எனினும், பணத்தைப் பெற்றுக்கொண்ட பின்னர் மோசடியில் ஈடுபடுபவர்கள் தொடர்புகொள்ள முடியாத வகையில் தலைமறைவாகிவிடுவதாக இலங்கை CERT தெரிவித்துள்ளது.
பொதுமக்களுக்கு விடுக்கப்பட்டுள்ள அறிவுறுத்தல்
எனவே, சமூக ஊடகங்களில் வெளியாகும் வெளிநாட்டுக் கல்வி விளம்பரங்களை மட்டும் நம்பி முடிவெடுக்க வேண்டாம் என இலங்கை CERT பொதுமக்களைக் கேட்டுக்கொண்டுள்ளது.
பல்கலைக்கழகத்தின் உத்தியோகபூர்வ இணையத்தளம், மாணவர் சேர்க்கை விபரங்கள் மற்றும் பிரதிநிதிகளின் அங்கீகாரம் ஆகியவற்றைச் சுயாதீனமாகச் சரிபார்க்க வேண்டும். மேலும், பணம் செலுத்துவதற்கு முன்பாக வழங்கப்படும் ஆவணங்கள் மற்றும் வங்கிக் கணக்கு விபரங்களின் உண்மைத்தன்மையை உறுதிப்படுத்த வேண்டும் என்றும் அறிவுறுத்தப்பட்டுள்ளது.
வெளிநாட்டில் கல்வி கற்கும் கனவை நனவாக்க முயற்சிக்கும் மாணவர்களும் பெற்றோர்களும், கவர்ச்சிகரமான வாக்குறுதிகளால் ஏமாறாமல் விழிப்புணர்வுடன் செயற்படுவது அவசியமாகும்.
.jpg)