ஹோமாகம பொலிஸ் பிரிவிற்குட்பட்ட மாவத்தகம பகுதியில், இணையம் ஊடாக வாகன விற்பனை விளம்பரங்களை வெளியிட்டுத் தருவதாகக் கூறி பண மோசடியில் ஈடுபட்டதாகச் சந்தேகிக்கப்படும் 21 வயது இளைஞர் ஒருவர் கைது செய்யப்பட்டுள்ளார்.
மத்திய குற்றவியல் விசாரணைப் பணியக அதிகாரிகளால் நேற்று (14) இரவு மேற்கொள்ளப்பட்ட விசாரணைகளின் அடிப்படையில் குறித்த சந்தேகநபர் கைது செய்யப்பட்டுள்ளார்.
ஹோமாகம, மாவத்தகம பகுதியைச் சேர்ந்த இளைஞரே இவ்வாறு கைது செய்யப்பட்டுள்ளார்.
முகநூல் ஊடாக மோசடி
விசாரணைகளின்படி, சந்தேகநபர் முகநூல் வணிகக் கணக்கின் ஊடாக வாகனங்களை விற்பனை செய்வதற்கான விளம்பரங்களை வெளியிட்டுத் தருவதாகக் கூறி, வாடிக்கையாளர்களிடம் பணம் கோரியுள்ளார்.
இதற்காக ஒரு வாரத்திற்கு 5,000 ரூபாய், இரண்டு வாரங்களுக்கு 10,000 ரூபாய் மற்றும் ஒரு மாதத்திற்கு 15,000 ரூபாய் எனக் கட்டணங்களைத் தொலைபேசி ஊடாக அறிவித்துப் பணம் பெற்றுள்ளதாகத் தெரிவிக்கப்படுகிறது.
எனினும், பணத்தைப் பெற்றுக்கொண்ட பின்னர் ஒப்புக்கொண்டபடி விளம்பரங்களை வெளியிடாமல், குற்றவியல் நம்பிக்கைத் துரோகம் மற்றும் ஆள்மாறாட்டம் மூலம் மோசடியில் ஈடுபட்டுள்ளதாக மேற்கொள்ளப்பட்ட விசாரணைகளில் தெரியவந்துள்ளது.
மேலதிக விசாரணைகள்
சம்பவம் தொடர்பில் கைது செய்யப்பட்ட சந்தேகநபருக்கு எதிரான மேலதிக விசாரணைகளை மத்திய குற்றவியல் விசாரணைப் பணியகம் முன்னெடுத்து வருகிறது.
