.jpe)
பிரான்சில் நிலவும் தற்போதைய அரசியல் மற்றும் சமூக நெருக்கடிகள் தொடர்பில் ஜனாதிபதி இமானுவேல் மக்ரோன் நாட்டு மக்களுக்கு உரையாற்றவுள்ளதாகத் தெரிவிக்கப்படுகிறது.
விலைவாசி உயர்வு மற்றும் பொதுச் சேவைகள் முடக்கத்திற்கு எதிராக நாடு முழுவதும் முன்னெடுக்கப்பட்ட போராட்டங்கள் வன்முறையாக மாறியுள்ளதாகக் கூறப்படுகிறது. இதனால் பல முக்கிய நகரங்களில் வர்த்தக நிலையங்கள் மற்றும் அரச கட்டடங்கள் சேதப்படுத்தப்பட்டுள்ளதாகத் தகவல்கள் தெரிவிக்கின்றன.
பிரான்சில் தீவிரமடையும் போராட்டங்கள்
பாரிஸ், லீல், மார்சேய், போர்டோ உள்ளிட்ட முக்கிய நகரங்களில் கடைகள், வர்த்தக மையங்கள் மற்றும் அரச கட்டடங்கள் சூறையாடப்பட்டு தீக்கிரையாக்கப்பட்டதாகக் கூறப்படுகிறது.
குறிப்பாக, லிமோஜஸ் (Limoges) நகரில் 143 ஆண்டுகள் பழமையான வரலாற்றுச் சிறப்புமிக்க நகர மண்டபம் தீக்கிரையாக்கப்பட்டதாகத் தெரிவிக்கப்படுகிறது.
இந்த வன்முறைச் சம்பவங்கள் தொடர்பில் 2,000-க்கும் மேற்பட்டோர் கைது செய்யப்பட்டுள்ளதாகவும், மோதல்களில் 600-க்கும் மேற்பட்ட பொலிஸார் காயமடைந்துள்ளதாகவும் தகவல்கள் தெரிவிக்கின்றன.
மேலும், பாரிஸில் நடைபெற்ற போராட்டத்தின்போது ஏற்பட்ட மோதல்களுக்கு மத்தியில் போராட்டக்காரர் ஒருவர் மாரடைப்பால் உயிரிழந்ததாகவும் கூறப்படுகிறது.
மக்ரோன் பதவி விலக வேண்டும் எனக் கோரிக்கை
இதற்கிடையில், முன்னணி சில்லறை வர்த்தக நிறுவனமான கரிஃபோர் (Carrefour) நிறுவனத்திற்குச் சொந்தமான கடைகள் உள்ளிட்ட 50-க்கும் மேற்பட்ட வர்த்தக நிலையங்கள் சேதப்படுத்தப்பட்டு சூறையாடப்பட்டதாகத் தெரிவிக்கப்படுகிறது. இதனால் பெருமளவிலான பொருளாதார இழப்புகள் ஏற்பட்டுள்ளதாகவும் கூறப்படுகிறது.
வன்முறைச் சம்பவங்களுக்குத் தீவிர இடதுசாரி அமைப்புகளே காரணம் என பிரான்ஸ் அரசாங்கம் குற்றஞ்சாட்டியுள்ளது.
இதேவேளை, தீவிர வலதுசாரித் தலைவரான ஜோர்டான் பார்டெல்லா, நாட்டில் நிலவும் நெருக்கடிகளுக்குப் பொறுப்பேற்று ஜனாதிபதி இமானுவேல் மக்ரோன் உடனடியாகப் பதவி விலக வேண்டும் என வலியுறுத்தியுள்ளதாகத் தெரிவிக்கப்படுகிறது.
பிரான்சில் போராட்டங்கள் தீவிரமடைந்துள்ள நிலையில், ஜனாதிபதி மக்ரோனின் உரை மற்றும் அரசாங்கத்தின் அடுத்தகட்ட நடவடிக்கைகள் குறித்து எதிர்பார்ப்பு நிலவுகிறது.
