நவம்பர் 1 முதல் 8 முக்கிய நடவடிக்கைகளுக்கு TIN இலக்கம் கட்டாயம்
வங்கி கணக்கு, வாகனப் பதிவு, காணி மற்றும் வியாபாரப் பதிவு உள்ளிட்ட பல்வேறு நடவடிக்கைகளுக்கு செல்லுபடியாகும் TIN இலக்கம் அவசியம்
கொழும்பு: 2026 நவம்பர் 1ஆம் திகதி முதல் சில குறிப்பிட்ட நடவடிக்கைகளை மேற்கொள்ளும்போது செல்லுபடியாகும் வரி செலுத்துவோர் அடையாள இலக்கமான (TIN)-ஐ சமர்ப்பிப்பது கட்டாயமாக்கப்பட்டுள்ளதாக உள்நாட்டு இறைவரித் திணைக்களம் அறிவித்துள்ளது.
இதன்படி, வங்கி அல்லது நிதி நிறுவனத்தில் கணக்கு ஆரம்பிக்கும் போது, கட்டிட வரைபடத்திற்கான அனுமதியைப் பெறும் போது, மோட்டார் வாகனத்தைப் பதிவு செய்யும் போது மற்றும் மோட்டார் வாகன உரிமத்தைப் புதுப்பிக்கும் போது செல்லுபடியாகும் TIN இலக்கத்தை சமர்ப்பிக்க வேண்டும்.
அத்துடன், காணி அல்லது காணியின் உரிமையைப் பதிவு செய்தல், வியாபாரத்தைப் பதிவு செய்தல், இலங்கையில் பதிவுசெய்யப்பட்ட நிறுவனமொன்றின் பங்குகளைப் பரிமாற்றம் செய்தல் மற்றும் கடன் அட்டையைப் பெறுதல் ஆகிய நடவடிக்கைகளுக்கும் TIN இலக்கம் கட்டாயமாக்கப்பட்டுள்ளது.
குறிப்பிட்ட நடவடிக்கைகளை மேற்கொள்வதற்கு முன்னர், சமர்ப்பிக்கப்படும் TIN இலக்கம் செல்லுபடியாக உள்ளதா என்பதை சம்பந்தப்பட்ட பொறுப்பான அதிகாரிகள் உறுதிப்படுத்திக் கொள்ள வேண்டும் என உள்நாட்டு இறைவரித் திணைக்களம் அறிவுறுத்தியுள்ளது.
TIN இலக்கம் இல்லாதவர்கள் என்ன செய்ய வேண்டும்?
இதுவரை TIN இலக்கத்தைப் பெற்றுக்கொள்ளாதவர்கள், மேற்கண்ட நடவடிக்கைகளை மேற்கொள்வதற்கு முன்னர் உள்நாட்டு இறைவரித் திணைக்களத்தில் பதிவு செய்து TIN இலக்கத்தைப் பெற்றுக்கொள்ளுமாறு அறிவுறுத்தப்படுகின்றனர்.
TIN இலக்கத்தை உள்நாட்டு இறைவரித் திணைக்களத்தின் e-Services இணையத்தளத்தின் ஊடாக விண்ணப்பித்து பெற்றுக்கொள்ள முடியும்.
எனவே, வங்கி கணக்கு ஆரம்பித்தல், வாகனப் பதிவு அல்லது உரிமம் புதுப்பித்தல், காணி மற்றும் வியாபாரப் பதிவு உள்ளிட்ட நடவடிக்கைகளை மேற்கொள்ள உள்ளவர்கள் தங்களிடம் செல்லுபடியாகும் TIN இலக்கம் உள்ளதா என்பதை முன்கூட்டியே உறுதிப்படுத்திக் கொள்ளுமாறு அறிவுறுத்தப்படுகின்றனர்.
