இலங்கை அரசாங்க அதிகாரிகளுடன் புதிய சுற்றுப் பேச்சுவார்த்தைகளை மேற்கொள்ளவுள்ள இந்தக் குழு, எதிர்வரும் 23ஆம் திகதி வரை நாட்டில் தங்கியிருந்து மதிப்பீட்டுப் பணிகளை முன்னெடுக்கவுள்ளது.
இலங்கைக்கான சர்வதேச நாணய நிதியத்தின் தூதுக்குழுத் தலைவர் இவான் பாப்பஜோர்ஜியோ தெரிவிக்கையில், IMF இன் நீடிக்கப்பட்ட நிதி வசதியின் (EFF) கீழ் ஆதரிக்கப்படும் இலங்கையின் சீர்திருத்த வேலைத்திட்டத்தின் ஒருங்கிணைந்த 7ஆவது மதிப்பாய்வு மற்றும் 2026ஆம் ஆண்டுக்கான உறுப்புரை IV ஆலோசனைகள் ஆகியவை இந்தப் பேச்சுவார்த்தைகளின் முக்கிய அம்சங்களாக இருக்கும் என தெரிவித்துள்ளார்.
மேலும், இந்த விஜயத்தின் முடிவில் சர்வதேச நாணய நிதியத்தின் குழு தனது மதிப்பீட்டு முடிவுகள் தொடர்பான அறிவிப்பை வெளியிட எதிர்பார்த்துள்ளதாகவும் அவர் குறிப்பிட்டுள்ளார்.
பொருளாதார ஸ்திரத்தன்மையைப் பேணுவதற்கும் நாட்டின் பொருளாதார மீட்சியை மேலும் வலுப்படுத்துவதற்குமான நடவடிக்கைகளை அரசாங்கம் தொடர்ந்து முன்னெடுத்து வரும் நிலையில், பொருளாதார சீர்திருத்தங்களை நடைமுறைப்படுத்துவதில் இலங்கை அடைந்துள்ள முன்னேற்றம் குறித்து IMF குழு விரிவாக மதிப்பாய்வு செய்யவுள்ளது.
அதேவேளை, நாட்டின் பேரண்டப் பொருளாதாரத்தில் ஏற்பட்டுள்ள சமீபத்திய முன்னேற்றங்கள் குறித்தும் IMF அதிகாரிகள் கவனம் செலுத்தவுள்ளதாக எதிர்பார்க்கப்படுகிறது.
இவான் பாப்பஜோர்ஜியோ தலைமையிலான IMF குழு, இதற்கு முன்னதாக 2026ஆம் ஆண்டு ஜூன் 24 முதல் 30ஆம் திகதி வரை கொழும்பில் விஜயம் மேற்கொண்டிருந்தது. அதனைத் தொடர்ந்து தற்போதைய செப்டெம்பர் மாத விஜயம் இடம்பெறுகிறது.
இலங்கையின் IMF கடன் திட்டத்தின் கீழ் இதுவரை வழங்கப்பட்டுள்ள மொத்த நிதி ஆதரவு சுமார் 2.4 பில்லியன் அமெரிக்க டொலர்கள் என குறிப்பிடப்பட்டுள்ளது.
