மே 7, 8ல் வியட்நாம் ஜனாதிபதியின் இலங்கை விஜயம் – கொழும்பில் கடும் பாதுகாப்பு, போக்குவரத்தில் பெரிய மாற்றம்!
வியட்நாம் ஜனாதிபதியின் இலங்கைக்கான உத்தியோகபூர்வ விஜயத்தை முன்னிட்டு, கொழும்பு மற்றும் அதனைச் சுற்றியுள்ள பகுதிகளில் மே 7 மற்றும் 8 ஆம் திகதிகளில் விசேட போக்குவரத்து திட்டம் அமுல்படுத்தப்படவுள்ளதாக இலங்கை பொலிஸ் திணைக்களம் அறிவித்துள்ளது.
உயர்மட்ட பாதுகாப்பு ஏற்பாடுகளுடன் நடைபெறவுள்ள இந்த விஜயத்தால், கொழும்பின் பல முக்கிய வீதிகளில் தற்காலிக போக்குவரத்து கட்டுப்பாடுகள் அமுல்படுத்தப்படவுள்ளதாக தெரிவிக்கப்படுகிறது. குறிப்பாக, மே 7 ஆம் திகதி இரவு பண்டாரநாயக்க சர்வதேச விமான நிலையம் இலிருந்து கொழும்பு நோக்கி ஜனாதிபதியின் வாகனத் தொடரணி பயணிக்கும் நேரத்தில் போக்குவரத்து கட்டுப்படுத்தப்படும்.
அதேபோல், மே 8 ஆம் திகதி ஜனாதிபதி செயலகம், கொழும்பு பொது நூலகம், இலங்கை பாராளுமன்றம் மற்றும் ஜனாதிபதி மாளிகை உள்ளிட்ட முக்கிய இடங்களுக்கு நடைபெறும் உத்தியோகபூர்வ பயணங்களின் போதும் விசேட பாதுகாப்பு மற்றும் போக்குவரத்து திட்டம் நடைமுறையில் இருக்கும்.
பாதுகாப்பு காரணங்களால், ஜனாதிபதியின் பயணத்திற்கு இரண்டு மணி நேரத்திற்கு முன்பாகவே குறிப்பிட்ட பாதைகளில் கனரக வாகனங்கள் செல்லத் தடை விதிக்கப்படவுள்ளது. மேலும், வாகனத் தொடரணி கடந்து செல்லும் நேரங்களில் ஏனைய வாகனங்கள் தற்காலிகமாக நிறுத்தப்படும் என்றும் பொலிஸார் தெரிவித்துள்ளனர்.
இதனால் கொழும்பு நகரில் கடும் போக்குவரத்து நெரிசல் ஏற்படும் வாய்ப்பு இருப்பதாக எச்சரிக்கப்பட்டுள்ள நிலையில், பொதுமக்கள் தேவையற்ற பயணங்களைத் தவிர்த்து மாற்று வழிகளைப் பயன்படுத்துமாறு பொலிஸார் அவசர கோரிக்கை விடுத்துள்ளனர்.
