சோழர் காலத்தின்
உன்னத அடையாளம்: உத்திரமேரூர் குடவோலை முறை
தென்னிந்திய வரலாற்றில் கி.பி. 9-ஆம் நூற்றாண்டு முதல் 13-ஆம் நூற்றாண்டு வரையிலான சோழர் காலம் ஒரு "பொற்காலம்" ஆகும்.
விஜயாலய சோழன் முதல் ராஜேந்திர சோழன் வரை பல மாமன்னர்கள் நாட்டை ஆண்டாலும்,
அவர்களின் போர் வெற்றிகளைத் தாண்டி இன்றும் உலகை
வியக்க வைப்பது அவர்களின் சிறந்த நிர்வாகத் திறமை ஆகும்.
உத்திரமேரூர்: வரலாற்றின் கருவூலம்
தமிழ்நாட்டில் காஞ்சிபுரம் அருகே உள்ள உத்திரமேரூர், 1,000 ஆண்டுகளுக்கு முன்பே ஒரு செம்மையான உள்ளாட்சி
அமைப்பைக் கொண்டிருந்தது. இங்குள்ள வைகுண்டப் பெருமாள் கோவிலில் காணப்படும்
முதலாம் பராந்தகச் சோழன் காலத்து (கி.பி. 917 மற்றும் 919) கல்வெட்டுகள், சோழர்களின் ஜனநாயகப் பண்பிற்குச் சான்றாக
விளங்குகின்றன.
"தமிழ்நாட்டில் உத்திரமேரூர் என்ற புகழ்பெற்ற சிறிய கிராமம் இருக்கிறது. இங்கு உள்ள 1,000-
1,200 ஆண்டுகளுக்கு முந்தைய கல்வெட்டு உலகம்
முழுவதையும் வியப்பில் ஆழ்த்துகிறது. இந்தக் கல்வெட்டு ஒரு சிறிய அரசமைப்பு
சாசனத்தைப் போல விளங்குகிறது. எவ்வாறு கிராம சபை நடத்தப்பட வேண்டும், கிராம சபை உறுப்பினர்களை எவ்வாறு தேர்ந்தெடுக்க
வேண்டும் என்பதெல்லாம் விரிவாக விளக்கப்பட்டிருக்கிறது,"
குடவோலை தேர்தல் முறை
கிராம நிர்வாகத்தைச் சிறந்த முறையில் நடத்த ஏரி வாரியம், தோட்ட வாரியம், பொன் வாரியம் போன்ற பல்வேறு வாரியங்கள் உருவாக்கப்பட்டன.
இதற்கான உறுப்பினர்களைத் தேர்ந்தெடுக்க 'குடவோலை' முறை பின்பற்றப்பட்டது.
- தேர்வு முறை: தகுதியுள்ள வேட்பாளர்களின் பெயர்கள்
ஓலையில் எழுதப்பட்டு ஒரு குடத்தில் இடப்படும். ஊர் மக்கள் முன்னிலையில் ஒரு
சிறுவனைக் கொண்டு ஓலை எடுக்கப்பட்டு, அதில் வரும் பெயரே உறுப்பினராக அறிவிக்கப்படும்.
வேட்பாளருக்கான தகுதிகள் மற்றும் கட்டுப்பாடுகள்
உறுப்பினராகப் போட்டியிட கடும் கட்டுப்பாடுகள் விதிக்கப்பட்டிருந்தன:
- சொந்த நிலமும், சொந்த வீடும் இருக்க வேண்டும்.
- வயது 35-70க்குள் இருக்க வேண்டும் (கல்வெட்டுகளுக்கு
ஏற்ப மாறுபடுகிறது).
- வேதம் மற்றும் சாஸ்திரங்களில் நிபுணராகவும்,
நல்லொழுக்கம்
கொண்டவராகவும் இருத்தல் அவசியம்.
- கடந்த 3 ஆண்டுகளில் வாரிய உறுப்பினராக
இருந்திருக்கக் கூடாது.
அதேபோல், லஞ்சம் வாங்கியவர்கள், கணக்கு காட்டாதவர்கள், கொலைக் குற்றம் செய்தவர்கள் மற்றும் அவர்களின் உறவினர்கள் தேர்தலில்
போட்டியிடத் தடை விதிக்கப்பட்டது. பொய் கையெழுத்துப் போட்டவர்களும், 'கழுதை ஏறியோரும்' தகுதியற்றவர்களாகக் கருதப்பட்டனர்.
வரலாற்றின் மதிப்பீடு
இந்தக் கல்வெட்டுகள் வெறும் சட்டங்கள் மட்டுமல்ல, அவை தமிழர்களின் நேர்மையான நிர்வாகத்திற்குச்
சான்று. இது குறித்து ஆய்வாளர் குடவாயில் பாலசுப்பிரமணியம் கூறுவது சிறப்பு:
"இவை மிக மிக முக்கியத்துவம் வாய்ந்த கல்வெட்டுகள். அந்த காலகட்டத்தில் ஊராட்சி
நிர்வாகம் மிகத் தூய்மையாக இருந்தது என்பதற்கு இந்தக் கல்வெட்டுகள்
எடுத்துக்காட்டு. இங்கு மட்டுமல்ல சோழ நாட்டில் வேறு சில இடங்களிலும் இதுபோல
கல்வெட்டுகள் கிடைத்துள்ளன. அந்தக் காலகட்டத்தில் ஊராட்சி நிர்வாகத்திற்குக்
கொடுக்கப்பட்டிருக்கும் முக்கியத்துவத்தையே இந்தக் கல்வெட்டுகள்
காட்டுகின்றன"
இருப்பினும், இது ஒரு பிரம்மதேய கிராமம் என்பதால், குறிப்பிட்ட சமூகத்தினர் மட்டுமே பங்கேற்க முடிந்தது என்ற விமர்சனமும் உண்டு.
எதுவாகினும், "சோழர் காலம் என்பது வெறும் போர் வெற்றிகள் மட்டுமல்ல; அது தமிழர்களின் கலை, பண்பாடு மற்றும் நிர்வாகத் திறமையின்
அடையாளம்."
ஆய்வுக் கட்டுரை
தி.யாதவன்
