.jpg)
இலங்கையின் சிறைச்சாலை விதிமுறைகள் மற்றும் நிலையான கட்டளைகளைப் புதுப்பிப்பதற்காக நியமிக்கப்பட்ட விசேட குழு, நேற்று (09) ஜனாதிபதி செயலகத்தில் கூடியுள்ளது.
முப்பீடங்களைச் சேர்ந்த மகா சங்கத்தினருக்கும் ஜனாதிபதி அநுரகுமார திசாநாயக்கவுக்கும் இடையில் கடந்த 8ஆம் திகதி இடம்பெற்ற கலந்துரையாடலில் எட்டப்பட்ட தீர்மானத்துக்கு அமைய இந்தக் குழு நியமிக்கப்பட்டுள்ளது.
சிறைச்சாலைகள் கட்டளைச் சட்டத்தின் கீழ் உருவாக்கப்பட்டுள்ள சட்ட விதிகள் மற்றும் நிலையான கட்டளைகளைப் புதுப்பித்து, அவற்றை மேலும் நடைமுறைக்கு ஏற்ற வகையில் மாற்றியமைப்பதே இக்குழுவின் முக்கிய நோக்கமாகும்.
குழுவின் தலைவரும் புத்தசாசன, மத மற்றும் கலாசார அலுவல்கள் அமைச்சின் செயலாளருமான பிரின்ஸ் சேனாதீர தலைமையில் நடைபெற்ற இக்கலந்துரையாடலில், நீதி மற்றும் தேசிய ஒருமைப்பாட்டு அமைச்சின் மேலதிக செயலாளர் பியுமந்தி பீரிஸ், பொது நிர்வாகம், மாகாண சபைகள் மற்றும் உள்ளூராட்சி அமைச்சின் மேலதிக செயலாளர் வசந்த ஆரியரத்ன, பௌத்த அலுவல்கள் ஆணையாளர் நாயகம் ஆர்.எம்.ஜே. சேனாரத்ன மற்றும் சிறைச்சாலைகள் திணைக்களத்தின் ஆணையாளர் ஏ.சி. கஜநாயக்க உள்ளிட்ட அதிகாரிகள் கலந்துகொண்டனர்.
இதன்போது, சிறைச்சாலை விதிமுறைகள் மற்றும் நிலையான கட்டளைகளைப் புதுப்பிப்பது தொடர்பான கொள்கை வழிகாட்டுதல்களை நீதி மற்றும் தேசிய ஒருமைப்பாட்டு அமைச்சர் சட்டத்தரணி ஹர்ஷன நாணயக்கார வழங்கியுள்ளார்.
இந்த விசேட குழுவின் ஊடாக சிறைச்சாலை நிர்வாகத்துடன் தொடர்புடைய நடைமுறைகள் மற்றும் விதிமுறைகளை மறுபரிசீலனை செய்து புதுப்பிப்பதற்கான நடவடிக்கைகள் முன்னெடுக்கப்பட்டு வருகின்றன.
