சர்வதேச சந்தையில் எரிபொருள் விலைகள் அதிகரித்ததால் பொதுமக்களுக்கு வழங்கப்பட்ட மின்சார மானியத்தையும், தரமற்ற நிலக்கரியால் ஏற்பட்டதாகக் கூறப்படும் நிதி இழப்பையும் ஒன்றுடன் ஒன்று தொடர்புபடுத்திப் பார்க்கக் கூடாது என எரிசக்தி மற்றும் சிவில் விமானப் போக்குவரத்து அமைச்சர் அநுர கருணாதிலக தெரிவித்துள்ளார்.
கொழும்பில் நேற்று (16.10.2026) ஊடகங்களுக்குக் கருத்துத் தெரிவிக்கும்போதே அவர் இதனைத் தெரிவித்துள்ளார்.
குறைந்த வருமானம் பெறும் நுகர்வோருக்கான மானியம்
சர்வதேச மற்றும் உள்நாட்டு சந்தைகளில் டீசல் விலைகள் அதிகரித்ததன் காரணமாக மின்சார உற்பத்திக்கான செலவுகள் கணிசமாக உயர்ந்ததாக அமைச்சர் குறிப்பிட்டுள்ளார்.
இதனால் இலங்கை மின்சார சபைக்கு ஏற்பட்ட நிதிச் சுமையைக் குறைப்பதற்கும், அந்தச் செலவுகள் பொதுமக்கள் மீது மேலதிக சுமையாக மாறுவதைத் தடுப்பதற்கும் அரசாங்கம் 15 பில்லியன் ரூபாவை மானியமாக வழங்கியதாக அவர் தெரிவித்துள்ளார்.
குறிப்பாக, மாதாந்தம் 180 அலகுகளுக்குக் குறைவாக மின்சாரத்தைப் பயன்படுத்தும் குறைந்த வருமானம் பெறும் நுகர்வோரின் மின்சாரக் கட்டணங்களை அதிகரிக்காமல், கூடுதல் செலவுகளை அரசாங்கமே ஏற்றுக்கொண்டதாகவும் அவர் விளக்கமளித்துள்ளார்.
மேலும், நாட்டில் நிலக்கரி தொடர்பான பிரச்சினைகள் ஏற்பட்டிருக்காவிட்டாலும், சர்வதேச சந்தையில் எரிபொருள் விலைகள் அதிகரித்ததால் பொதுமக்களுக்கு ஏற்படக்கூடிய பாதிப்புகளைக் குறைப்பதற்காக இந்த மானியத்தை அரசாங்கம் வழங்க வேண்டியிருந்திருக்கும் எனவும் அமைச்சர் தெரிவித்துள்ளார்.
தனியார் எரிபொருள் நிலையங்களின் விநியோகச் சிக்கல்
நாட்டில் ஆரோக்கியமான சந்தைப் போட்டியை உருவாக்கும் நோக்கில் சில தனியார் நிறுவனங்களுக்கு எரிபொருள் விநியோக உரிமங்கள் வழங்கப்பட்டதாக அமைச்சர் குறிப்பிட்டுள்ளார்.
எனினும், எதிர்பார்த்த அளவிலான பலன்கள் கிடைக்கவில்லை எனத் தெரிவித்த அவர், நெருக்கடியான சூழல்களில் தங்களது இலாப வரம்புக்கு ஏற்ற விலைகள் அமையாதபோது சில தனியார் நிறுவனங்கள் எரிபொருள் விநியோகத்தைக் கட்டுப்படுத்தவோ அல்லது தற்காலிகமாக நிறுத்தவோ முற்படுவதாகக் கூறியுள்ளார்.
குறிப்பாக, சில தொலைதூரப் பகுதிகளில் தனியார் எரிபொருள் நிலையங்கள் மட்டுமே இயங்குவதால், விநியோகத் தடைகள் ஏற்படும்போது அப்பகுதி மக்கள் பெரும் சிரமங்களை எதிர்கொள்வதாகவும் அவர் சுட்டிக்காட்டியுள்ளார்.
புதிதாக 75 எரிபொருள் நிலையங்களை ஆரம்பிக்கத் திட்டம்
இத்தகைய சிக்கல்களுக்குத் தீர்வு காண்பதுடன், நாடு முழுவதும் தடையற்ற எரிபொருள் விநியோகத்தை உறுதிப்படுத்தும் நோக்கிலும் அரசாங்கம் நடவடிக்கை எடுத்து வருவதாக அமைச்சர் தெரிவித்துள்ளார்.
இதன் ஒரு பகுதியாக, சட்ட ஒப்பந்தங்களுக்கு உட்பட்டு புதிதாக 75 எரிபொருள் நிலையங்களை ஆரம்பிக்கத் திட்டமிட்டுள்ளதாகவும் அவர் மேலும் குறிப்பிட்டுள்ளார்.
எரிபொருள் விலை உயர்வால் பொதுமக்களுக்கு ஏற்படும் சுமையைக் குறைத்தல், மின்சார விநியோகச் செலவுகளை நிர்வகித்தல் மற்றும் நாட்டில் தடையற்ற எரிபொருள் விநியோகத்தை உறுதிப்படுத்துதல் ஆகியவை அரசாங்கத்தின் முக்கிய நோக்கங்களாக இருப்பதாக அமைச்சரின் கருத்துகள் எடுத்துக்காட்டுகின்றன.
