அனைவராலும் பெரிதும் விரும்பப்பட்ட காவந்திஸ்ஸ யானை உயிரிழந்துள்ள நிலையில், முன்னாள் ஜனாதிபதி மகிந்த ராஜபக்ச தனது இறுதி அஞ்சலியைச் செலுத்தியுள்ளார்.
இது தொடர்பில் தனது முகநூல் பக்கத்தில் உருக்கமான பதிவொன்றை வெளியிட்டுள்ள அவர், இலங்கையின் வரலாறு, கலாசாரம் மற்றும் பௌத்த மத மரபுகளில் யானைகள் வகிக்கும் முக்கியத்துவத்தையும் நினைவுகூர்ந்துள்ளார்.
சிகிச்சை பலனின்றி உயிரிழந்த காவந்திஸ்ஸ
இலங்கையின் மிகப்பெரிய மற்றும் உயரமான தந்தங்களைக் கொண்ட யானைகளில் ஒன்றாகக் கருதப்பட்ட காவந்திஸ்ஸ, முன் வலது காலில் துப்பாக்கிச் சூட்டினால் ஏற்பட்டதாகக் கூறப்படும் காயத்திற்காக கடந்த 24ஆம் திகதி பிற்பகல் முதல் சிகிச்சை பெற்று வந்ததாகத் தெரிவிக்கப்படுகிறது.
இந்நிலையில், கடந்த சில நாட்களாக உணவு உட்கொள்ளாமை உள்ளிட்ட நோய் அறிகுறிகள் அவதானிக்கப்பட்டதைத் தொடர்ந்து, நேற்று (16) இரவு அந்த யானை உயிரிழந்துள்ளது.
மகிந்த ராஜபக்சவின் உருக்கமான பதிவு
காவந்திஸ்ஸ யானையின் மறைவு குறித்து முன்னாள் ஜனாதிபதி மகிந்த ராஜபக்ச வெளியிட்ட பதிவில், அதனை வனத்தின் மாபெரும் மன்னனாக வர்ணித்துள்ளார்.
“மாபெரும் வனத்தின் மன்னனான காவந்திஸ்ஸவை வனமே இறுதியாகத் தழுவிக்கொண்டது என நான் நம்புகிறேன்” என்ற உணர்வுபூர்வமான கருத்தை அவர் தனது பதிவில் வெளிப்படுத்தியுள்ளார்.
மேலும், இலங்கையின் வரலாற்றில் யானைகள் முக்கிய இடத்தைப் பெற்றுள்ளதைச் சுட்டிக்காட்டிய அவர், மகாவம்சம் உள்ளிட்ட வரலாற்று ஆவணங்களிலும், ஸ்ரீ தலதா மாளிகையின் எசல பெரஹரா போன்ற மத விழாக்களிலும் யானைகளின் பங்களிப்பு குறிப்பிடத்தக்கது என நினைவுகூர்ந்துள்ளார்.
இலங்கைக் கலாசாரத்தின் உயிருள்ள அடையாளம்
யானை என்பது வெறுமனே ஒரு வனவிலங்கு மட்டுமல்ல; அது இலங்கையின் வரலாறு, மதம், கலை மற்றும் பாரம்பரிய வாழ்க்கை முறையுடன் பின்னிப் பிணைந்த ஓர் உயிருள்ள அடையாளம் என்றும் மகிந்த ராஜபக்ச தனது பதிவில் வலியுறுத்தியுள்ளார்.
பெருமை, வலிமை, பொறுமை மற்றும் கருணை ஆகிய பண்புகளின் அடையாளமாகத் திகழும் யானைகளைப் பாதுகாப்பது அவசியம் என்பதையும் அவரது பதிவு உணர்த்துகிறது.
இலங்கையின் வனவிலங்கு மரபில் தனித்துவமான இடத்தைப் பெற்றிருந்த காவந்திஸ்ஸ யானையின் மறைவு, அதனை நேசித்த மக்கள் மத்தியில் சோகத்தை ஏற்படுத்தியுள்ளது.
