சிவகார்த்திகேயன் நடிப்பில் உருவாகி வரும் ‘சேயோன்’ திரைப்படத்தின் சில காட்சிகள் மீண்டும் படமாக்கப்பட்டு வருவதாகவும், இதனால் படத்தின் தயாரிப்புப் பணிகளில் தாமதம் ஏற்பட்டுள்ளதாகவும் பிரபல பத்திரிகையாளர் அந்தணன் தெரிவித்துள்ளார்.
சிவக்குமார் முருகேசன் இயக்கத்தில் உருவாகும் இப்படத்தை நடிகர் கமல்ஹாசன் தயாரித்து வருகிறார். சிவகார்த்திகேயனின் முந்தைய படங்களான ‘பராசக்தி’, ‘மதராஸி’ ஆகியவை எதிர்பார்த்த வரவேற்பைப் பெறாத நிலையில், ‘சேயோன்’ படத்தின் மூலம் மீண்டும் வெற்றிப் பாதைக்குத் திரும்ப வேண்டும் என்ற எதிர்பார்ப்பு ரசிகர்கள் மத்தியில் அதிகரித்துள்ளது.
சிவகார்த்திகேயன் தனது திரைப்பயணத்தில் பல்வேறு விமர்சனங்களையும் சவால்களையும் எதிர்கொண்டு முன்னணி நடிகராக வளர்ந்துள்ளார். ‘பிரின்ஸ்’ திரைப்படத்தின் தோல்விக்குப் பின்னர் ‘மாவீரன்’, ‘அயலான்’, ‘அமரன்’ உள்ளிட்ட படங்கள் அவருக்குப் பெரும் கவனத்தைப் பெற்றுத் தந்தன.
குறிப்பாக, ‘அமரன்’ திரைப்படத்தின் வணிக வெற்றி சிவகார்த்திகேயனின் திரைப்பயணத்தில் முக்கியமான திருப்புமுனையாக அமைந்தது. இதனால், ‘சேயோன்’ படத்தின் மீதும் ரசிகர்கள் அதிக எதிர்பார்ப்புகளை வைத்துள்ளனர்.
படப்பிடிப்பில் ஏற்பட்ட சிக்கல்கள் என்ன?
‘சேயோன்’ திரைப்படத்தை இயக்கும் சிவக்குமார் முருகேசன், முன்னதாக இயக்கிய ‘தாய் கிழவி’ திரைப்படத்தின் மூலம் ரசிகர்களின் கவனத்தை ஈர்த்திருந்தார். இதனால், சிவகார்த்திகேயனை வைத்து அவர் உருவாக்கும் புதிய படம் குறித்த எதிர்பார்ப்பும் அதிகரித்துள்ளது.
இந்நிலையில், படத்தின் சில பகுதிகள் மீண்டும் படமாக்கப்படுவதாகத் தகவல்கள் வெளியாகியுள்ளன. மேலும், ஒளிப்பதிவாளர் மற்றும் சண்டைக் காட்சிகளுக்கான மாஸ்டர் உள்ளிட்ட தொழில்நுட்பக் குழுவிலும் மாற்றங்கள் செய்யப்பட்டதாகக் கூறப்படுகிறது.
ரீஷூட் குறித்து அந்தணன் கூறியது என்ன?
தனியார் யூடியூப் சேனலுக்கு அளித்த பேட்டியில் பத்திரிகையாளர் அந்தணன் தெரிவிக்கையில், சிறிய அளவிலான படங்களை விரைவாக முடித்த இயக்குநர், முன்னணி நடிகரை வைத்து படம் இயக்கும்போது சில குழப்பங்களைச் சந்தித்திருக்கலாம் எனக் குறிப்பிட்டுள்ளார்.
மேலும், படப்பிடிப்பின்போது சில சிக்கல்கள் ஏற்பட்டதாகவும், இதுவரை படமாக்கப்பட்ட காட்சிகளைப் பார்வையிட்ட பின்னர் தயாரிப்பாளர் கமல்ஹாசன் மீண்டும் படப்பிடிப்பை நடத்துமாறு அறிவுறுத்தியதாகவும் அவர் தெரிவித்துள்ளார்.
இருப்பினும், ரீஷூட் தொடர்பான தகவல்கள் குறித்து படக்குழுவிடமிருந்து அதிகாரப்பூர்வ அறிவிப்பு வெளியாகியுள்ளதா என்பது உறுதிப்படுத்தப்படவில்லை.
சீமான் உள்ளிட்டோர் முக்கியமான கதாபாத்திரங்களில் நடித்து வரும் ‘சேயோன்’, சிவகார்த்திகேயனின் அடுத்த முக்கியமான திரைப்படமாகக் கருதப்படுகிறது. இப்படம் அவரது முந்தைய படங்களின் வரவேற்பு தொடர்பான விமர்சனங்களுக்கு முற்றுப்புள்ளி வைக்குமா என்பதைப் பொறுத்திருந்துதான் பார்க்க வேண்டும்.
