ஹோர்முஸ் நீரிணையிலிருந்து அனுமதியற்ற மற்றும் ஆபத்தான கடல் வழியைப் பயன்படுத்தி வெளியேற முயன்ற கச்சா எண்ணெய்த் தாங்கிக் கப்பலொன்று கடற்படைக் கண்ணிவெடியில் சிக்கி வெடித்துத் தீப்பற்றியதாக ஈரானிய செய்தி நிறுவனம் ஒன்று தெரிவித்துள்ளது.
ஈரானின் இஸ்லாமியப் புரட்சிகரப் பாதுகாப்புப் படை (IRGC) வெளியிட்டதாகக் கூறப்படும் அறிக்கையில், குறித்த எண்ணெய்க் கப்பல் ஹோர்முஸ் நீரிணையிலிருந்து வெளியேற முயன்றபோது அதன் வழிசெலுத்தல் மற்றும் உலகளாவிய இருப்பிடக் கண்டறிதல் (GPS) அமைப்புகளைச் செயலிழக்கச் செய்திருந்ததாகக் குறிப்பிடப்பட்டுள்ளது.
இதன்போது, கப்பல் கடற்படைக் கண்ணிவெடியில் சிக்கியதாகவும், அதனைத் தொடர்ந்து கப்பலில் தீப்பரவல் ஏற்பட்டதாகவும் அந்த அறிக்கையில் தெரிவிக்கப்பட்டுள்ளது.
கப்பலில் ஏற்பட்ட தீப்பரவல்
கப்பலில் ஏற்பட்ட தீ மிகப்பெரிய அளவில் பரவியதாகவும், தொலைவிலுள்ள கடலோரப் பகுதிகளில் வசிப்பவர்களாலும் தீப்பிழம்புகளைக் காண முடிந்ததாகவும் தகவல்கள் வெளியாகியுள்ளன. எனினும், சம்பவம் தொடர்பான மேலதிக விவரங்களும் சுயாதீனமான உறுதிப்படுத்தலும் அவசியமாகின்றன.
இதற்கிடையில், ஹோர்முஸ் நீரிணையின் பாதுகாப்பு விதிமுறைகளைப் புறக்கணித்து பயணிக்கும் எண்ணெய்த் தாங்கிக் கப்பல்கள் கடுமையான விளைவுகளைச் சந்திக்க நேரிடும் என IRGC எச்சரித்துள்ளதாகக் கூறப்படுகிறது.
மேலும், அனுமதியற்ற கடல் வழிகளைப் பயன்படுத்தும் கப்பல்களுக்கு எதிரான நடவடிக்கைகள் ஹோர்முஸ் நீரிணையுடன் மட்டும் மட்டுப்படுத்தப்படாது என்றும், முழுப் பிராந்தியத்திலும் அத்தகைய கப்பல்கள் கண்காணிக்கப்பட்டு நடவடிக்கை எடுக்கப்படும் என்றும் ஈரானியப் பாதுகாப்புப் படை தெரிவித்துள்ளதாக அந்தச் செய்தியில் குறிப்பிடப்பட்டுள்ளது.
ஹோர்முஸ் நீரிணையில் அதிகரிக்கும் பதற்றம்
அமெரிக்கா மற்றும் இஸ்ரேல் முன்னெடுத்துவரும் தாக்குதல்கள் ஆரம்பமானதைத் தொடர்ந்து, ஹோர்முஸ் நீரிணை தமது ஆயுதப் படைகளின் முழுமையான கட்டுப்பாட்டில் இருப்பதாக ஈரான் கூறியுள்ளது.
உலகளாவிய எரிசக்தி வர்த்தகத்தில் முக்கியப் பங்கு வகிக்கும் இந்த நீரிணையில் நிலவும் பாதுகாப்பு அச்சுறுத்தல்கள் காரணமாக, அதன் ஊடான வர்த்தகக் கப்பல் போக்குவரத்து கடுமையாகப் பாதிக்கப்பட்டுள்ளதாகவும் தகவல்கள் தெரிவிக்கின்றன.
ஹோர்முஸ் நீரிணையில் ஏற்படும் எந்தவொரு மேலதிக மோதலும் சர்வதேச எண்ணெய் விநியோகம், எரிபொருள் விலைகள் மற்றும் உலகப் பொருளாதாரத்தில் தாக்கங்களை ஏற்படுத்தக்கூடும் என்பதால், அப்பகுதியின் பாதுகாப்பு நிலைமை சர்வதேச அளவில் உன்னிப்பாகக் கவனிக்கப்பட்டு வருகிறது.
