100 ரூபாய் இலஞ்சப் பணத்தைக் கோரிப் பெற்றுக்கொண்டதாகக் கூறப்படும் குற்றச்சாட்டின் பேரில், வீதிப் போக்குவரத்து அதிகாரசபையின் கம்பஹா பிராந்திய அலுவலகத்தைச் சேர்ந்த நேரக் கண்காணிப்பு அதிகாரி ஒருவர் கைது செய்யப்பட்டுள்ளார்.
இலஞ்ச ஊழல் ஒழிப்பு விசாரணை ஆணைக்குழுவின் அதிகாரிகளால் நேற்று (20) நண்பகல் 12.25 மணியளவில் இந்தக் கைது நடவடிக்கை முன்னெடுக்கப்பட்டுள்ளது.
ரத்தோலுகம பேருந்து நிலையத்தில் அமைந்துள்ள நேரக் கண்காணிப்பாளரின் அறையில் வைத்து சந்தேகநபர் கைது செய்யப்பட்டதாகத் தெரிவிக்கப்பட்டுள்ளது.
188ஆம் இலக்க வீதியில் ரத்தோலுகமவிலிருந்து கொழும்பு நோக்கிப் பயணிக்கும் பேருந்தொன்றின் பயண நேரத்தைத் தாமதமாக ஆரம்பிப்பதற்கும், சாதகமான முறையில் பயணத்தைத் தொடங்குவதற்கு அனுமதிப்பதற்கும், குறித்த பேருந்தின் ஊழியர் ஒருவரிடமிருந்து 100 ரூபாய் பணத்தைச் சந்தேகநபர் இலஞ்சமாகக் கோரிப் பெற்றுள்ளதாகக் குற்றஞ்சாட்டப்பட்டுள்ளது.
இந்த முறைப்பாட்டின் அடிப்படையில் மேற்கொள்ளப்பட்ட நடவடிக்கையிலேயே அதிகாரி கைது செய்யப்பட்டுள்ளார்.
கைது செய்யப்பட்ட சந்தேகநபர் கொழும்பு நீதிவான் நீதிமன்றத்தில் ஆஜர்படுத்தப்படவுள்ளதாகத் தெரிவிக்கப்பட்டுள்ளது.
சம்பவம் தொடர்பான சட்ட நடவடிக்கைகள் தொடர்ந்து முன்னெடுக்கப்படவுள்ளன.
