இஸ்ரேல் நீண்டகாலமாக முன்வைத்து வரும் கோரிக்கைக்கு அமைவாக, காசா பகுதியில் ஐக்கிய நாடுகள் சபையின் பாலஸ்தீன அகதிகளுக்கான நிவாரண மற்றும் பணி முகவரகமான UNRWA-வின் பங்களிப்பை ஏற்றுக்கொள்ள முடியாது என அமெரிக்கா தலைமையிலான ‘சமாதான சபை’ தெரிவித்துள்ளதாக செய்திகள் வெளியாகியுள்ளன.
காசாவில் போர்நிறுத்தத்தை கண்காணிப்பதுடன், அப்பகுதியின் மறுசீரமைப்பு மற்றும் மீட்புப் பணிகளையும் மேற்பார்வையிடும் பொறுப்பு இந்தச் சபைக்கு வழங்கப்பட்டுள்ளது.
காசா மக்களின் தேவைகளைப் பூர்த்தி செய்யக்கூடியதும், சபையால் நம்பகமானதாகக் கருதப்படுவதுமான கூட்டாளர்களுடன் மட்டுமே இணைந்து செயற்படவுள்ளதாக ‘சமாதான சபை’ தெரிவித்துள்ளது. அந்த அளவுகோல்களை UNRWA பூர்த்தி செய்யவில்லை எனவும் சபை குறிப்பிட்டுள்ளது.
காசா மறுசீரமைப்புக்கு பில்லியன் டொலர் திட்டம்
இதற்கிடையில், காசாவின் ஆரம்பகட்ட மறுசீரமைப்பு மற்றும் அடிப்படை சேவைகளை மீளக் கொண்டுவருவதற்காக 2.4 பில்லியன் அமெரிக்க டொலர் மதிப்பிலான ஆறு மாத திட்டத்தை அமெரிக்கா தலைமையிலான ‘சமாதான சபை’ முன்வைத்துள்ளது.
66 திட்டங்களை உள்ளடக்கிய இந்த முன்மொழிவு, காசாவில் மறுசீரமைப்புப் பணிகளை ஆரம்பிப்பதை நோக்கமாகக் கொண்டுள்ளது. காசாவின் நடுத்தரகால முழுமையான மறுசீரமைப்புக்கு சுமார் 35.2 பில்லியன் டொலர்களும், அடுத்த பத்து ஆண்டுகளில் மொத்தமாக சுமார் 71.4 பில்லியன் டொலர்களும் தேவைப்படலாம் என மதிப்பிடப்பட்டுள்ளது.
இந்நிலையில், காசாவின் மீட்பு மற்றும் மறுசீரமைப்புப் பணிகளில் UNRWA-வின் எதிர்கால பங்களிப்பு தொடர்பில் சர்வதேச அளவில் தொடர்ந்து விவாதங்கள் இடம்பெற்று வருகின்றன. ஐ.நா. தரப்பில், காசாவின் ஆரம்பகட்ட மீட்புப் பணிகளில் UNRWA-வின் பங்கு முக்கியமானது என வலியுறுத்தப்பட்டுள்ளது.
