.jpeg)
மத்திய கிழக்கில் தொடர்ந்துவரும் மோதல்களை தணிக்கவும், ஹோர்முஸ் நீரிணை தொடர்பான சர்ச்சைகளை தீர்க்கவும் ஈரானும் அமெரிக்காவும் மீண்டும் பேச்சுவார்த்தைகளை தொடங்க ஒப்புக்கொண்டுள்ளதாக அமெரிக்க அதிகாரி ஒருவரை மேற்கோள் காட்டி ரொயிட்டர்ஸ் செய்தி வெளியிட்டுள்ளது.
இரு தரப்புகளுக்கும் இடையே அண்மையில் ஏற்பட்ட பரஸ்பர தாக்குதல்களால் பாதிக்கப்பட்டிருந்த இடைக்கால அமைதி முயற்சிகள் தற்போது மீண்டும் உயிர்பெறும் அறிகுறிகள் காணப்படுகின்றன. இதன் மூலம் பிராந்திய நிலைமை நிலைத்தன்மை பெறும் நம்பிக்கை அதிகரித்துள்ளதாக தெரிவிக்கப்படுகிறது.
ஜூன் 17ஆம் திகதி எட்டப்பட்ட 14 அம்ச புரிந்துணர்வு ஒப்பந்தத்தின் அடிப்படையில், அனைத்து பிரிவுகளையும் உள்ளடக்கிய தொழில்நுட்ப ரீதியிலான பேச்சுவார்த்தைகள் தொடரும் என அந்த அதிகாரி தெரிவித்துள்ளார். மேலும், இரு தரப்பும் தற்காலிகமாக தாக்குதல்களை குறைத்து, கப்பல் போக்குவரத்துக்கு சுதந்திரம் வழங்கும் நிலை உருவாகும் எனவும் குறிப்பிடப்பட்டுள்ளது.
இந்த ஒப்பந்தத்தின் கீழ் ஹோர்முஸ் நீரிணை மீண்டும் சர்வதேச கப்பல் போக்குவரத்துக்காக திறக்கப்பட உள்ளது. உலகின் முக்கிய எரிசக்தி வழித்தடங்களில் ஒன்றாக கருதப்படும் இந்த நீரிணையின் நிலைமை உலக சந்தைகளில் கவனத்தை பெற்றுள்ளது.
இதற்கிடையில், லெபனானில் ஈரான் ஆதரவு பெற்ற ஹிஸ்புல்லா அமைப்பின் மீது இஸ்ரேல் மீண்டும் தாக்குதல் நடத்தியுள்ளது. தெற்கு லெபனானில் உள்ள ஒரு கிராமத்தில் அந்த அமைப்பின் நிலத்தடி கட்டமைப்புகள் அழிக்கப்பட்டதாக இஸ்ரேல் இராணுவம் தெரிவித்துள்ளது.
கடந்த வெள்ளிக்கிழமை அறிவிக்கப்பட்ட புதிய போர்நிறுத்த ஒப்பந்தத்திற்குப் பின்னரும், சனிக்கிழமை நடைபெற்ற தாக்குதலின் தொடர்ச்சியாக இந்த நடவடிக்கை மேற்கொள்ளப்பட்டதாக கூறப்படுகிறது.
மற்றொரு புறம், பிராந்திய அளவிலான விரிவான அமைதி ஒப்பந்தம் நீடிக்க வேண்டுமானால் லெபனானில் நடைபெறும் போர்கள் நிறுத்தப்பட வேண்டும் என ஈரான் வலியுறுத்தியுள்ளது.
இதேவேளை, ஹோர்முஸ் நீரிணையில் எண்ணெய் ஏற்றிச் செல்லும் கப்பல் தாக்கப்பட்ட சில மணித்தியாலங்களுக்குப் பிறகு, தாங்கள் ஈரான் மீது தாக்குதல் நடத்தியதாக அமெரிக்க இராணுவம் முன்னதாக அறிவித்திருந்தது.
.jpeg)